ചിത്രത്തിന്റെ പേര് ഡൗണ്ട്ലെസ്സ് ഫോഴ്സ് (ഭയമില്ലാത്ത സേന) എന്ന് മാറ്റുമെന്നും റിപ്പോര്ട്ടുണ്ട്. മോഹന്ലാലിനു നേരിട്ടു പരിചയമുള്ള വ്യക്തിയാണ് കഥയിലെ കേന്ദ്രകഥാപാത്രമായ അയ്യപ്പന്പിള്ള മാധവന് നായര്. 1990-ലാണ് അദ്ദേഹം മരിക്കുന്നത്. ലാലിന്റെ പിതാവ് വിശ്വനാഥന് നായര്ക്കു നായര് സാനെ അടുത്ത് അറിയാമായിരുന്നു. പഠനകാലത്ത് ബ്രിട്ടീഷുകാര്ക്കെതിരെ പോരാടിയ മാധവന് നായര്ക്ക് ഒടുവില് ഇന്ത്യ വിട്ട് ജപ്പാനിലേയ്ക്ക് പോകേണ്ടി വരുന്നു. എന്നാല് അവിടെയെത്തിയ ശേഷവും മാധവന് നായര് പോരാട്ടം തുടരുകയാണ്. ജപ്പാന്കാരെ കൂടെ കൂട്ടിയാണ് അദ്ദേഹം ബ്രിട്ടീഷുകാര്ക്കെതിരെ ശക്തമായ പോരാട്ടം തുടര്ന്നത്. നായര് സാന്റെ ഈ പോരാട്ടം നിറഞ്ഞ ജീവിതകഥയാണ് വെള്ളിത്തിരയില് എത്താന് പോകുന്നത്. ജപ്പാനിലെ ഹീറോയായി വാഴ്ത്തപ്പെടുന്ന മാധവന് നായരോടുള്ള ബഹുമാനം കൊണ്ടാണ് ചിത്രം നിര്മ്മിക്കാന് ജാപ്പനീസ് സംരംഭകര് തയാറായത്.
ചിത്രത്തിലെ സംഘട്ടന രംഗം സംവിധാനം ചെയ്യുന്നതും ജാക്കി ചാന് ആയിരിക്കും. ഇതിലെ കഥാപാത്രത്തിനായി മോഹന്ലാല് ആയോധനകല പരിശീലിക്കും. നായര് സാനാവാന് ഒട്ടേറെ ശാരീരിക തയാറെടുപ്പുകള് ലാലിന് വേണ്ടി വരും. ആല്ബര്ട്ടാണ് ഈ ചിത്രം സംവിധാനം ചെയ്യുന്നത്. ജാപ്പനീസ്, ഇംഗ്ലീഷ് ഭാഷകളിലാണ് ചിത്രം നിര്മിക്കുന്നത്. ഇത് മലയാളം, തമിഴ്, ഹിന്ദി, മന്താരിന്, മംഗോളിയന് എന്നീ ഭാഷകളില് ഡബ്ബ് ചെയ്യും. ചിത്രത്തിനായി മോഹന്ലാല് ജാപ്പനീസ്, മന്താരിന് ഭാഷകള് പഠിച്ചുകൊണ്ടിരിക്കുകയാണ്. ലോകത്ത് ഏറ്റവും കൂടുതല് പേര് സംസാരിക്കുന്ന ഭാഷയാണ് ചൈനീസ് മന്താരിന്.
